عند قلبي دوسْت ( إنتَر ) .. قُلْت أخَلّي الشوق يفور
و انتي دايما عند قلبك .. دايسه ( ألت ) و ( إف فور ) ؟؟
حاولي مرّه تـ(ـماكسيمايزي ) .. شاشة الحب اللي داب
و امّا تبقي جوّه قلبي .. دوسي ( ألت ) و دوسي ( تاب )
تِلْقي يمكن خمسه ( ويندوز ) جوّه قلبي مفتوحين
( ويندو ) للأحزان .. وباقي .. حب .. غيرَه .. شوق .. حنين
نفسي أترقّى في قلبك و املا كل الدنيا حب
لو انا في ( ستارت مِنيو ) ... نفسي اكون عالـ(ـديسك توب )
و ارجع اسمع تاني منّك كلمه ياما اتردّدت
بُصّي بَصّه جوّه قلبي .. تلقى فيه مكتوب ( إديت )
ليه يضيع الشوق مابينّا .. و الغرام و الإحساسات
اللي قسّوكي عليّا .. دول أساسا ( فايروسات )
ياما بين قُربِك و بُعدِك .. فُقْت و رجعت اتسطلت
كُلّ ما افتح ( مِنْيو ) بينّا .. انتي تيجي تدوسي ( ألت ) ؟؟!!
و امّا اقول قلبك هايرجع .. قلبي بيقول .. مافتِكِرْش
فين حنانك ؟؟ .. دوسْت ( إف ثري ) .. عشان اعمللُه ( سيرش )
طالبه حب بدون حنانك ؟؟!! .. انتباه .. يعني ( أتينشَن )
تِلْقي ( فايلي ) إزاي ؟؟!! .. ياناسيه الـ(ـنيم ) .. و ناسيه الـ(ـإكستينشَن )
انتي حبك جوّه قلبي .. ياما غنّا و ياما نطّ
ليه أنا قلبي فحياتك .. حتّى مالهوش ( شورت كَت ) ؟؟!!
الحبايب جوّه قلبك مالزحام اتمرمطوا
غيّري قلبك .. يا إمما .. إدّيهولي ( أفرمتُه )
كنت فاكر إن حبك .. عُمْر ما شيء يِهْدِمُه
شهر .. و اتأكّدْت فعلا ... إن حُبّك كان ( ديمو )
فاضل ايه بعد الاماني الحلوه .. إلا خصام و عِنْد ؟؟!!
علّميلي عاللي فاضل بيننا .. دوسي ( شيفت ) ( إند )
بعد ما فكّرت أزوّغ .. قُمْت في عيونك .. حِليت ؟؟!!
لما نِفْسك ترجعيلي .. دوستي ليه ( شيفت ) و ( ديليت ) ؟؟!!
قبل مالأيام تـ(ـدَلْيِت ) قلبي بالحب اللي فيه
كُنْتي دوسي ( كنترول ) مع ( إس ) .. لاجل تـ(ـسَيّفيه )
بطّلي شُغل الملاوعه .. أصلي ناصح مش دُغُفّ
و ارجعيلي احسن و ديني .. أزهق أعمل ( تيرن أوف )
