مره من 4 سنوات تقريبا لقيت اعلان في الجرنال
عن ثلاجه مياه بسعر خرافي
ولا في الاحلام ,ايامها كنت باشوفها معروضه بمبلغ فوق الالف جنيه
ولقيت الاعلان ده نازا ب 550 بس
وبيقولوا ان ده عرض الشتاء (علشان كد سعرها رخيض)
المهم ماكدبتش خبر ,واتصلت بيهم وطلبت واحده
وتاني يوم ,وصلت البضاعه
والمندوب وصل الثلاجه وشغلها لنا علشان نجربها
المفاجاْه بقى ايه؟
الثلاجهمش بتسقع الميه بتسخنها بس
(طبعا احنا عارفين ان ثلاجات الميه بيكون
فيها عدد 2 صنبور مياه (حنفيه ) واحده بارده والتانيه سخنه
لقينا السخنه شغاله والساقعه كانت بعافيه شويه
المندوب رد وقال لنا علشان بس دورة التبريد بتاخد
لها ساعتين ومش معقول هاقعد معاكوا ساعتين
احنا صدقنا وسيبناه يمشي
واستنى في الثلاجه تطلع قماش؟قصدي ميه ساقعه .
وهيه حالفه 60 يمين ماتطلع ميه ساقعه
طول الليل مانمتش رايحه جايه اصب ميه واشربها واقول لنفسي
(الميه سقعت شويه)
المهم تاني يوم استوعبت ان الميه مش بتسقع .
واتصلنا بالشركه اللي عامله الاعلان .
فقالوا لنا هانبعت لكم واحده تانيه
وبعد كده قعدوا يمطوحوا فينا
عرفنا احنا بقى انها نصبايه
بس اسكت؟؟؟
لا طبعا لازمن ولابد اخد حقي
قعدت افكر وافكر لحد ماوصلت لحل هايل
اتفقت مع والدي انه يتصل بيهم من رقم تاني غير اللي انا اتصلت بيه
ويطلب منهم طلبات بفلوس اكتر من ثمن الثلاجه
ويديهم نفس العنوان بتاعي بس مع تغيير بسيط
يعني بدل بجوار صيدليه كذا ,
يبق بجوار مدرسة كذا
(والبيت فعلا بجوار المدرسه والصيدليه
وقد كان
جه المندوب وطلع بالطلبات ,
وساعتها كانت عباره عن شنيور وطقم حلل تركي وحاجات تانيه كتير
بعد ماوصل المندوب
(وكان طبعا مندوب تاني غير اللي جاب الثلاجه)
وده كان من حظنا لانه مايعرفش قصة الثلاجه
ودخل بحسن نيه
وبابا وجوزي كانوا موجودين وقالوا له يا ابن الحلال
انت تسيب البضاعه من غير ولا مليم وتروح لعيالك
علشان القصه كذا كذا واحنا هاناخد الحاجات دي بدل الثلاجه الخربانه
وهاتسيب التلاجه كمان علشان الشركه تتاْدب
والمفاجاْه كانت .
المندوب باع الشركه واللي فيها واخد حق توصيل الحاجات بس(20 جنيه)
وقال لنا انا مبقوق اصلا منهم
ورحنا احنا متصلين بالشركه
وقلنا لهم (فلوسنا ترجع لنا لحد البيت,او انتوا كده تبقوا خسرانين
كمان 750 جنيه تمن الحاجات اللي احنا اخدناها ومش هاندفع تمنها)
النتيجه بتاعت موقعة الثلاجه كانت
جه مندوب تاني ومعاه الفلوس بتاعتا واخد الثلاجه
والبضاعه النص كم بتاعتهم
وتوته توته
