الخطوه الرابعه:الانشغاااااااااااااااااااااااااااااااااااااااال
انشغال ايه ياحاجه ما احنا طبعا مشغولين
والا قاعدين فاضيين يعنى نعد النجوم
استنى بس هو انتو كل مره كده تخشوا شمال؟
صبرك عليه معنى الانشغال هو
الانشغال القلبى والفكرى
وهو فروع
اول فرع:الانشغال بالله
حبى ربنا زى ما قلنا
واستعينى بيه واتقربى منه
اقرى كلامه بتدبر وصلى بخشوع وفكرى فى عظمته
اختلى بنفسك وعيطى من خشية الله يمكن ربنا يظلك بظله
افتكرى دايما ان جوزك
لا هيقعد معاكى فى القبر
ولا هينفعك فى الاخره
فى القبر اللى هيلازمك عملك الصالح
وفى الاخره كل واحد هيهرب من التانى ويقول نفسى نفسى
قوليلى لما تموتى بعد عمر طويل وتسئلى عن عمرك فيما ابليتيه
هتقولى ايه:ابليته فى حب جوزى ونكد جوزى والتمحور حول جوزى
ربنا بيقول فى القراءن (قل ان صلاتى ونسكى ومحياى ومماتى لله رب العالمين)
اذن هنا مربط الفرس انتى مش بتنضفى الشقه لجوزك لا لله
عشان انتى بتتقى الله عشان انتى نفسك تخشى الجنه
انتى مش بتخلفى عشان تربطيه بالعيال
لا انا بخلف عشان اجيب ذريه مسلمه تسبح بحمد الله وتقدس له
انتى مش بتهتمى بنفسك عشان هو يبص ويرميلك ابتسامه حمضانه
انتى مش بتطبخى عشان هو ياكل
واقرب طريق لقلب الراجل معدته والكلام البايظ بتاع اعلان سمن النخلتين
لا انتى بتتطبخى عشان ياكل ويتقوى على العمل وربنا يديكى حسنات
من ساهم فى عمل كان له مثل اجر اللى عمله بالضبط
انتى بتهتمى بنفسك لان النظافه من الايمان
وربنا بيديكى اجر عشان انتى بتتزينى له
هو مجرد مطيه للعبور للجنه والله جه وبقى واد حبيب فبها
ونعمت مجاش والله انا كده كده كسبانه حسنات
وربنا بيؤجرنى ان شاء الله
حاولى تبرى مامتك وباباكى واديلهم حيز لا باس به
من تفكيرك طاعة لله وردا لجميلهم الكبير
الفرع التانى:انشغالك بولادك
بمعنى اشغلى نفسك بولادك قلبا وقالبا مش نظام تبقى
بتعملى السندوتش للولد تحطيله مربى على جبنه
لانك سرحانه فى مشكله مع سعادة الباشا
الولد يا عينى :يا ماما يا ماما
انتى:اخررس يا ولد انا مش فايقالك
انتى تنشغلى بولادك يا ستى
كلكم راع
وكلكم مسئول عن رعيته لازم تهتمى بدينهم بمذاكرتهم بنظافتهم
بحفظهم للقراءن كام واحده مننا ابنها او بنتها
حافظه حاجه جامده من المصحف
شبه مفييييييش
احنا فاضيين للكلام ده يا جدع
الفرع الثالث:انشغالك بنظافة شقتك
روقى وضيفى لمساتك مش عشان سعادة الكوماندا الكبير
لا عشان نفسك
حاولى تحطى ورد يضفى جو من البهجه فى البيت
روقى مطبخك بطريقه مبتكره
نظمى دولابك باسلوب مختلف كل فتره
بخرى البيت عطرى الهدوم
وده مش عشان الباشا ده لله اولا ثم عشان انتى ست نظيفه
(انا مش قصير واوزعه انا طويل واهبل)
الفرع الرابع:انشغالك بنفسك
يابنت الحلال حبى نفسك شويه
دورى على هوايه حلوه تكونى بتحبيها تحسى انك انسانه لها وجود
كتابه بس مش كتابة جوابات هبل لسعادة الباشا
لا مثلا تطريز تريكو قراءه مثلا استضافة اصحاب
وخلى دايما اخر اليوم ليكى وقت يسمى فى علم النفس me time
يعنى وقتى الشخصى بعد ما الولاد يناموا والباشا كمان
شغلى اباجوره وافتحى
الاذاعه على القراءن او برنامج اذاعى بتحبيه
واضربى كوباية كاكاو او اى
مشروب سخن او بارد تحبيه
واقرى حاجه لذيذه
صدقينى الموضوع ده مجرب وبيجدد النفسيه جددددددددددددد
ا ولو داومتى عليه هتبتدى تحبى نفسك وده تقريبا اول الطريق
