حماتى ملاك حماتى هلاك مش فارقة كدة كدة هى حماتى

الحموات دول مش حماتي وحماتك انتي بس لأ دول حتى امهاتنا حموات لولادهم واحنا هنبقى حموات لولادنا وبناتنا هيبقو حموات لولادهم يعني من الآخر

كأس وداير على الكل وربنا يستر حماتي ملاك ولا حماتي هلاك مش فارقة هيا كده كده حماتي

طبعا مفيش واحدة فينا اتجوزت ولا حتى اتخطبت ولا حتي لسه هتتجوز ولا حتي لسه صغيرة ومعروف جواها ومتربي جواها كام معني وأولهم 

الحماه عمي

حماتي قنبلة ذرية

حماتي ملاك طبعا انت بتحلم

  حماتي ملاك ولا حماتي هلاك مش فارقة هيا كده كده حماتي-كوني انثي

وغيره وغيره من الحاجات المروعة واللي بتخلينا خايفين موت من حماتنا واللي هتعملو فينا 

وطبعا انا مش هنكر ان في حموات كتير ينطبق عليهم الأمثال دي وانهم لا يطاقو لكن برده اللي عايزاكو تفكرو فيه ان مش كلهم كده وان في حموات بيراعو ربنا أوي في مراة ابنهم وبيحبوها يعني من الأخر في ده وفي ده وخلينا متفائلين وهنقول ان نصهم حلو ونصهم وحش

وطبعا برده محدش فينا ينكر حاجة مهمة جدا ان برده احنا مش كلنا كويسين في المعاملة معاهم في اللي وحش ومطلع عين جوزه وحماته وفي برده اللي حلو وبيحاول يرضي جوزه وحماته وبرضه هنبقى متفائلين وهنقول نصنا حلو ونصنا وحش

وده أول الخيط اللي عايزين نمسكه مع بعض انهم مش كلهم وحشين واحنا كمان مش كلنا حلوين يعني مش هما الشيطان واحنا الملاك

واكيد معظمكو متفق معايا في الموضوع ده

انتي بقى هتصدعينا ليه يا يويا متقولي المفيد وتخلصي بقى بلاش رغي حماتي ملاك ولا حماتي هلاك مش فارقة هيا كده كده حماتي-كوني انثي

اكيد معظمكو بيقول دلوقتي كده وانا طبعا هقول (حااااااااااااااااااااااااضر)

بصو بقى انا هفترض معاكو اسوأ الظروف وهيا ان حماتي وحشة جدا ومعاملتها زي الزفت واني عايشة معايا ومفيش أمل اننا نروح نعيش لواحدنا 

بيتهيألي ان دي من أصعب المواقف اللي منحبش نتحط فيها

بس لو افترضنا ان ده حصل فعلا هنعمل ايه هنعاملها وحش ونكد على نفسنا وعلى بيتنا ده تصرف ممكن يحصل بس الأكيد انه مش هيجيب نتيجة كويسة وبرضه مش هيريحنا وفي نفس الوقت 

كما تدين تدان ومحدش ينسي الجملة دي لأن لو افتكرناها في معظم تصرفاتنا هنخاف نزعل حد

يبقى هتصرف معاها ازاي؟ حماتي ملاك ولا حماتي هلاك مش فارقة هيا كده كده حماتي-كوني انثي

أولا هفترض افتراض اقنع نفسي بيه غصب عني

ان حماتي دي هيا مامتي مش حماتي وكلنا بنقبل امهاتنا على أي وضع مع انهم ممكن يكونو بيطلعو عنينا ساعات لكن بنحبهم برضهم وبنخاف من زعلهم وغضبهم علينا

ثانيا : ان الست دي أم جوزي حبيبي اللي اتجوزته وعايشة معاه على الحلوة والمرة وهيا اللي خلفته ليا وجابته للدنيا بعد طبعا ارادة ربنا علشان يبقى جوزي وانها تعبت في تربيته وشقيت فيها لغاية مبقى راجل وانها خايفة اني آخده منها وابعده عنها واخليه ينساها وممكن تكون كمان بتغير منييعني من الآخر تفكير كلنا هنتحط فيه في يوم من الأيام

ثالثا :انها أمر واقع ولازم اتعامل معاه فالأحسن اني اكسبه أحسن ما أخسره حتى لو هيا وحشة انا ابقى حلوة وده بسبب أخلاقي وتربيتي اللي انا اتربيت عليها

رابعا :ودي مهمة أوي جوزي اكيد هيبقى فرحان لما يشوفني بستحملها وبحاول مزعلهاش وكمان الحلو اوي ان مش كل شوية اقوله أمك عملت أمك قالت اكيد زهق من الجملة دي وهيبقى فرحان اوي انه معدتش بيسمعها وغير كل ده هتكبري في نظره اوي انك مستحملاه ومستحملة كل حاجة معاه وهيحس انه اختار انسانة كويسة بجد وصالحة وتستاهل تبقى مراته وأم عياله وعمره مهيفكر في غيرك وحتى لو فكر يبقى هو اللي مش مظبوط وده مش موضوعنا الأساسي دلوقتي بس أكيد هيبقى حسابه عند ربنا وممكن كمان دنيا وأخرة انه ظلم بنات الناس معاه

خامسا: عيالك ثم عيالك لما يسمعو مامتهم بتكلم جدتهم وحش او حتي بتتكلمي عليها وحش في عدم وجودها أ حتي هيا بتشتم فيكي ولا بتغلط فيكي قدامهم في وجودك أو عدمه وحتى لو هيا بقى ست قادرة وخلاص محدش قادر عليها وهتغلط قدامهم أكيد هيبقى موقف تاني لما تردي عليها بذوق أو تبقى ذوق في الحوار معاها قدامهم أكيد نفسيتهم هتبقى احسن كتير من انهم يكرهو الجواز من وهما صغيرين ولا يطلعو مش سويين بسبب تصرفاتكو مع بعض وهتبقى انتي الجانية عليهم لانهم ولادك انتي ومحدش هيخاف عليهم زيك

سادسا ودي آخر حاجة وأهم حاجة : ربنا هيرضي عنك في الدنيا وهيجازيكي في الآخره ويعلى مقامك في الجنة لانك راعيتي ربنا في جوزك وحماتك وعيالك وفي نفسك كمان واترحمتي من الغيبة والنميمة اللي كلنا بنقع فيهم وغضب الزوج  واللي معظمنا بينساه والأهم رضا الرب علينا وعلى بيوتنا وبركته اللي هتحل عليهم وغير كده ان اللي هتعمليه هيتردلك في يوم من الأيام

وصدقوني معنديش حاجة اقولها بعد كده غير ان ربنا يهدينا كلنا ويهدي حمواتنا وأزواجنا لينا ويحفظلنا بيويتنا ويباركلنا فيها وفي عيالنا ويخلينا أجمل النساء وأطهرهم في عيون أزواجنا وربنا يهدي الجميع